Որոնել
Արխիվ
13.06.2018  22:56

ՀՖՖ-ն պարզաբանում է «Շիրակի» գործով ՈւԵՖԱ-ի որոշումը

Հունիսի 11-ին ՀՖՖ-ն հրապարակեց ՈւԵՖԱ-ի բողոքարկման մարմնի 2018թ. հունիսի 5-ի որոշումը: Այդ որոշման վերաբերյալ պարզաբանումներ ստանալու նպատակով ՀՖՖ պաշտոնական կայքը դիմել է ՀՖՖ Վարչաիրավական դեպարտամենտի ղեկավար Լուսինե Բակումյանին:


-Հարգելի տ-ն Բակումյան, ՈւԵՖԱ-ի բողոքարկման մարմինն անդրադարձավ «Շիրակ» ՖԱ-ի գործին և կայացրեց որոշում: ՀՖՖ-ն հրապարակեց բավական բարդ և երկար իրավաբանական տեքստը: Կխնդրեինք առավել մատչելի պարզաբանել այն մեր երկրպագուների համար:


-Սիրով: Միանգամից ասեմ, որ իրավացի եք, առաջին հայացքից շատ բարդ, բայց և միևնույն ժամանակ իրավագիտության տեսանկյունից շատ պարզ, տրամաբանական և հետաքրքիր որոշում է:

Նախ և առաջ, ակնհայտ էր, որ «Շիրակ» ՖԱ-ն դադարեցնելով ՈւԵՖԱ-ի ակումբային մրցաշարին իր մասնակցությունը՝ փորձել էր դուրս գալ ՈւԵՖԱ-ի իրավասությունից և դրանով խուսանավել ՈւԵՖԱ-ի հնարավոր պատժամիջոցներից, ինչպես նաև կատարված դեպքի առնչությամբ ՈւԵՖԱ-ի հնարավոր գնահատականներից:


Եվ, թեև ՈւԵՖԱ-ն վերը նշված իրավասության բացակայության հիմքով դադարեցրել է «Շիրակ» ՖԱ-ի դեմ հարուցված վարույթը՝ այնուհանդերձ ուշադրության արժանի մի քանի կարևոր կետերով բացահայտել է «Շիրակ» ՖԱ-ի մտադրությունը և տվել համապատասխան գնահատականներ:


-Որո՞նք են այդ կետերը:

Որոշման՝ուշադրության արժանի կետերն են.

1. ՈւԵՖԱ-ի կարգապահական մարմինները գնահատելով առկա բոլոր ապացույցները՝  ապացուցված են համարել պայմանավորված խաղի կազմակերպման փաստի առկայությունը, (որքան էլ որ «Շիրակ» ՖԱ-ն փորձի հակառակը պնդել),

2. ՈւԵՖԱ-ն Բողոքարկման մարմնի իր որոշման մեջ հստակ արձանագրել է, որ «Շիրակ» ՖԱ-ի կողմից ՈւԵՖԱ-ի մրցումներին իր մասնակցության դադարեցումը պետք է համարվի որպես կամավոր կերպով պատժի կատարում ժամկետով, որը հավասարազոր կլիներ ՈՒԵՖԱ-ի կողմից մասնակցության իրավունքի զրկման ժամկետին,

3. ՈւԵՖԱ-ի Կարգապահական մարմինը, սակայն, պատժի նման՝ կամավոր հարկադրման տարբերակը գնահատել է ոչ համապատասխան ,

4. ՈւԵՖԱ-ն հստակ եզրակացրել է, որ «Շիրակ» ՖԱ-ի նշված քայլը վերջինիս չի ազատում ՈւԵՖԱ-ի հնարավոր հետագա կարգապահական վարույթից, այն դեպքում, երբ ակումբը կորակավորվի եվրոպական ակումբային մրցաշարերին,

Այսպիսով ստացվում է, որ ՈւԵՖԱ-ն թեև վերը նշված որոշմամբ «Շիրակ» ՖԱ-ի նկատմամբ հարուցված վարույթը դադարեցրել է, սակայն այնուամենայնիվ չի զլացել ակումբի գործողություններին գնահատական տալուց, ինչպես նաև արձանագրել է, որ ակումբին հետագայում պատասխանատվության ենթարկելու հնարավորությունը չի սպառվել: 


-Շատ են շահարկումները, թե իբրև ՀՖՖ-ն համաչափ պատժամիջոց չի սահմանել «Շիրակ» ակումբի նկատմամբ և, եթե պայմանավորված խաղ «խաղալու» համար է «Շիրակը» պատժվել, ապա ինչու՞ «Բանանց» ակումբն էլ չի պատժվել:  


-Գիտեք, դա Շիրակի ղեկավարների կողմից կոնկրետ միտումով արվող հայտարարություններ են՝ նպատակ ունենալով ապակողմնորոշել թե իրենց երկրպագուներին և թե մյուսներին, ովքեր ծանոթ չեն գործին:

Զուտ իրավական տեսանկյունից այստեղ ամեն բան առավել քան պարզ է: Կարգապահական կանոնակարգի 12-րդ հոդվածն ասում է. «...պայմանավորված խաղերի կազմակերպումը....» և «...նույն արարքի փորձ կատարելը...», այլ ոչ՝ պայմանավորված խաղեր խաղալը կամ խաղալու փորձ կատարելը: Կանոնակարգն ի սկզբանե սահմանել է, որ պարտադիր չէ, որ պայմանավորված խաղը խաղացվի, որ կարգապահական միջոցներ կիրառվեն, այլ լրիվ բավարար է՝ կազմակերպված լինելու փաստը: Այս դեպքում ապացուցված է, որ «Շիրակի» պաշտոնյան տրամադրել է կանխավճար և խոստացել լրացուցիչ գումար՝ խաղի ելքն իրենց օգտին վճռելու նպատակով:

Այստեղ նույնն է պնդել, որ կաշառատուի կողմից կաշառակերին կանխավճար տալը և վերջնավճար խոստանալը դեռևս կաշառք չէ՝ այլ կաշառքի  փորձ:

Ինչ վերաբերվում է շահարկումներին, թե ինչու «Բանանց» ՖԱ-ն չի պատժվել, ապա ևս մեկ անգամ նշեմ, որ չնայած, որ «Բանանց» ՖԱ-ի ֆուտբոլիստը  ներգրավված է եղել՝ գործում առկա ապացույցները փաստում են, որ նա ներգրավվել է իր կամքից անկախ: Բացի այդ, նրա կողմից անմիջապես դրսևորված հետագա պահվածքն ապացուցում է, որ նրա գործողություններում ուղղակիորեն բացակայում են ՀՖՖ Կարգապահական կանոնակարգի 12-րդ հոդվածով սահմանված արարքի տարրերը:

Ավելին, որպեսզի ընդհանրապես բոլորի մոտ այդ հարցը փակվի, հարկ եմ համարում ուշադրություն հրավիրել այն հանգամանքի վրա, որ «Բանանց» ՖԱ-ն ևս որակավորվել է Եվրոպայի ակումբային մրցաշարին: Եվ, հաշվի առնելով այն, որ «Շիրակ» ՖԱ-ի գործը մանրակրկիտ ուսումնասիրվել է ՈւԵՖԱ-ի համապատասխան մարմինների կողմից, ապա թող ոչ մեկի մոտ կասկած չլինի, որ «Բանանցի» ֆուտբոլիստի, արդյունքում նաև «Բանանց» ՖԱ-ի ներգրավվածության փոքր ինչ կասկածի դեպքում անգամ՝ ՈւԵՖԱ-ի կողմից վարույթ կհարուցվեր նաև «Բանանց» ՖԱ-ի նկատմամբ՝ դրանից  բխող բոլոր իրավական և մարզական հետևանքներով հանդերձ:

ArmFootball.com


Բարձրագույն խումբ
99 Թիմ Խ Մ
1 Շիրակ 25 44
2 Ալաշկերտ
25 41
3 Բանանց
25 39
4 Գանձասար Կ
25 34
5 Փյունիկ
25 29
6
Արարատ
25 17
մանրամասն

Soccerway.com

Հարցում
Քվեարկել են (0)  |  Այլ հարցում
Բոլոր իրավունքները պաշտպանված են: © ArmFootball.com 2018
Մեջբերումներ անելիս հղումը «ArmFootball.com»-ին պարտադիր է:
Գովազդատուներին 060 511 511