Ռիո-2016. Օր14. Բոլտ` «թրիփլ-թրիփլ». 14-րդ օրվա ամփոփումը (VIDEO)

31-րդ ամառային օլիմպիական խաղերի 14-րդ օրը մեդալների 22 հավաքածու խաղարկվեց: Օրվա կենտրոնական իրադարձությունները կանանց ու տղամարդկանց 4x100 փոխանցումավազքերն էին: Կանանց պայքարում ԱՄՆ հավաքականը բոլորից արագ հաղթահարեց մրցատարածությունը` իրենից հետ թողնելով Ճամայկայի ու Մեծ Բրիտանիայի հավաքականներին: Իսկ տղամարդկանց փոխանցումավազքում կրկին իրենց հավասարը չունեին ճամայկացիները: Ասաֆա Փաուելը, Յոհան Բլեյքն ու Նիկել Էշմեյդը կարողացան փոքր առավելություն ապահովել վերջին մրցափուլում վազող Ուսեյն Բոլտի համար, որն էլ վստահ տարավ իր թիմին դեպի հաղթանակը: Բոլտը նվաճեց իր 9-րդ օլիմպիական ոսկին, ընդ որում, վերջին երեք օլիմպիական խաղերին նա հաղթել է բոլոր մրցաձևերում, որտեղ հանդես է եկել` 100մ, 200մ, 4x100 փոխանցումավազք:

14-րդ օրը նաև տեղի ունեցան մի քանի խաղային մարզաձևերի եզրափակիչներն ու կիսաեզրափակիչները: ԱՄՆ-ի ջրագնդակի կանանց հավաքականը եզրափակչում 12-5 հաշվով պարտության մատնեց Իտալիային ու երկրորդ անգամ անընդմեջ ճանաչվեց օլիմպիական չեմպիոն: Երկու դեպքում էլ ԱՄՆ-ի հավաքականի ղեկին կանգնած է եղել Ադամ Գրիգորյանը:

Կանանց խոտի հոկեյի եզրափակչում Մեծ Բրիտանիան ու Հոլանդիան ստիպված էին դիմել հետխաղյա բուլիտների: Ավելի դիպուկ գտնվեցին բրիտանուհիները:

Օլիմպիական խաղերի կանանց ֆուտբոլի եզրափակչի պատմության մեջ առաջին անգամ հանդիպեցին երկու եվրոպական հավաքականներ` Գերմանիան ու Շվեդիան: Բոլոր գոլերը խփվեցին երկրորդ կեսում: Նախ գերմանուհիները երկու գնդակ ուղարկեցին մրցակցի դարպասը, հետո շվեդուհիները կրճատեցին հաշիվը, սակայն դա բավարար չէր: Գերմանուհիները իրենց պատմության մեջ առաջին անգամ դարձան օլիմպիական խաղերի ֆուտբոլի չեմպիոն: Երրորդ տեղի համար պայքարում Կանադան հաղթեց տանտերերի ընտրանուն:

Բասկետբոլի տղամարդկանց մրցաշարի կիսաեզրափակչում ԱՄՆ հավաքականը ուժեղ գտնվեց Իսպանիայից, իսկ Սերբիան ջախջախեց Ավստրալիային, որին պարտվել էր խմբային փուլում:

Վոլեյբոլի մրցաշարում փայլուն հանդիպում անցկացրին Իտալիան ու ԱՄՆ-ը: Ամերիկացիները առաջին սեթում 7 միավորի առավելություն ունեին, սակայն իտալացիները կարողացան բեկել խաղի ընթացքն ու աստիճանաբար հավասարեցրին խաղն ու հաշիվը, սեթի վերջում էլ ավելի ամուր նյարդերի շնորհիվ հաղթանակ կորզեցին: Երկրորդ սեթը դասավորվեց ճիշտ հակառակ սցենարով. Իտալիան ուներ առավելություն, սակայն սեթի վերջում ամերիկացիների բլոկը սկսեց հրաշալի գործել, ինչի շնորհիվ նրանք հավասարեցրին հաշիվը` 1-1: Երրորդ սեթում ամերիկացիները պարզապես ջախջախեցին մրցակցին` 25-9: 4-րդ սեթում էլ ԱՄՆ-ը երկար ժամանակ առավելություն ուներ, հաղթում էր վերջնամասում 22-19 հաշվով, բայց երբ սկսեց մատուցել իտալացիների առաջատար Իվան Զայցևը, ամեն ինչ գլխիվայր շրջվեց: Իտալացիները 6 անընդմեջ միավոր վաստակեցին ու հաղթեցին սեթը 25-22 հաշվով: Վճռական 5-րդ սեթում էլ արդեն իտալացիները շանս չտվեցին մրցակցին` 15-9:

Եզրափակչում իտալացիները կհանդիպեն տանտերերի` Բրազիլիայի ընտրանուն, որը շատ վստահ հաղթանակ տարավ օլիմպիական գործող չեմպիոն Ռուսաստանի հավաքականի նկատմամբ` 3-0:

Մեդալային հաշվարկում առաջինն ԱՄՆ է` 38 ոսկե (ընդհանուր` 105) մեդալով: Մեծ Բրիտանիան ունի 24 ոսկե (ընդհանուր` 60), Չինաստանը` 22 ոսկե (ընդհանուր` 65) մեդալ: Գերմանիան 4-րդն է` 14 ոսկե մեդալով, Ռուսաստանը հետ է մնում մեկ ոսկիով, Ճապոնիան ունի 12 ոսկե մեդալ ու զբաղեցնում է 6-րդ տեղը:

Աթլետիկա. տղամարդիկ, քայլք 50կմ (VIDEO)
1. Մատեյ Տոտ (Սլովակիա)
2. Ջարեդ Թալենթ (Ավստրալիա)
3. Հիրոոկի Արաի (Ճապոնիա)

Բադմինտոն. կանանց մենախաղ (VIDEO)
1. Կարոլինա Մարին (Իսպանիա)
2. Սինդխու Պուսարլա (Հնդկաստան)
3. Նոձոմի Օկուհարա (Ճապոնիա)

Սինքրոն լող. թիմային (VIDEO)
1. Ռուսաստան
2. Չինաստան
3. Ճապոնիա

Բադմինթոն. տղամարդկանց զուգախաղ (VIDEO)
1. Ֆու Հայ Ֆեն/ Չզան Նան (Չինաստան)
2. Գո Շեմ Վեյ/ Տան Վի (Մալազիա)
3. Քրիս Լենգրիջ/ Մարկուս Էլիս (Մեծ Բրիտանիա)

Ձիասպորտ. անհատական կոնկուր (VIDEO)
1. Նիք Սքելթոն (Մեծ Բրիտանիա)
2. Պեդեր Ֆրեդրիկսոն (Շվեդիա)
3. Էրիկ Լամազ (Կանադա)

Աթլետիկա. կանայք, քայլք 20կմ (VIDEO)
1. Լյու Հուն (Չինաստան)
2. Մարիա Գոնսալես (Մեքսիկա)
3. Լյու Սյուչժի (Չինաստան)

Հեծանվասպորտ. BMX. կանայք (VIDEO)
1. Մարիանա Պախոն (Կոլումբիա)
2. էլիս Փոսթ (ԱՄՆ)
3. Սթեֆանի Էրնանդես (Վենեսուելա)

Հեծանվասպորտ. BMX. տղամարդիկ (VIDEO)
1. Քոներ ՖԻլդս (ԱՄՆ)
2. Յելե վան Գորկոմ (Հոլանդիա)
3. Կառլոս Ալբերտո Ռամիրես (Կոլումբիա)

Ջրագնդակ. կանայք (VIDEO)
1. ԱՄՆ
2. Իտալիա
3. Ռուսաստան

Բռնցքամարտ. կանայք, 60կգ (VIDEO)
1. Էստելլա Մոսսելի (Ֆրանսիա)
2. Ին Ցզյուն Հուա (Չինաստան)
3. Միրա Պոտկոնեն (Ֆինլանդիա)
3. Անաստասիա Բելյակովա (Ռուսաստան)

Ազատ ոճի ըմբշամարտ. տղամարդիկ, 57 կգ (VIDEO)
1. Վլադիմիր Խինչիգաշվիլի (Վրաստան)
2. Ռեի Հիգուտի (Ճապոնիա)
3. Հաջի Ալիև (Ադրբեջան)
3. Հասան Ռահիմի (Իրան)

Ֆուտբոլ. կանայք (VIDEO)
1. Գերմանիա
2. Շվեդիա
3. Կանադա

Խոտի հոկեյ. կանայք (VIDEO)
1. Մեծ Բրիտանիա
2. Հոլանդիա
3. Գերմանիա

Ժամանակակից հնգամարտ. կանայք (VIDEO)
1. Խլոյա Էսպոզիտո (Ավստրալիա)
2. Էլոդի Կլովել (Ֆրանսիա)
3. Օկտավիա Նովացկայա (Լեհաստան)

Ազատ ոճի ըմբշամարտ. տղամարդիկ, 74կգ (VIDEO)
1. Հասան Յազդանի (Իրան)
2. Անուար Գեդուև (Ռուսաստան)
3. Ջաբրայիլ Հասանով (Ադրբեջան)
3. Սոներ Դեմիրթաշ (Թուրքիա)

Թեքվանդո. կանայք, 67 կգ (VIDEO)
1. Օ Հյո Ռի (Հարավային Կորեա)
2. Աբի Նիարե (Ֆրանսիա)
3. Նուր Թաթար (Թուրքիա)
3. Ռութ Գբագբի (Կոտ Դ’Իվուար)

Թեքվանդո. տղամարդիկ, 80 կգ (VIDEO)
1. Շեյկ Սիսե (Կոտ Դ'Իվուար)
2. Լուտալո Մուհամադ (Մեծ Բրիտանիա)
3. Ուսամա Ուեսլատի (Թունիս)
3. Միլադ Հարչեգանի (Ադրբեջան)

Աթլետիկա. կանայք, ձողացատկ (VIDEO)
1. Եկատերինա Ստեֆանիդի (Հունաստան)
2. Սենդի Մորիս (ԱՄՆ)
3. Էլիզա Մաքկարթնի (Նոր Զելանդիա)

Աթլետիկա. տղամարդիկ, մուրճի նետում (VIDEO)
1. Դիլշոդ Նազարով (Տաջիկստան)
2. Իվան Տիխոն (Բելառուս)
3. Վոյցեխ Նովիցկի (Լեհաստան)

Աթլետիկա. կանայք, վազք 5000մ (VIDEO)
1. Վիվիան Չերույոտ (Քենիա)
2. Հելեն Օբիրի (Քենիա)
3. Ալմազ Այանա (Եթովպիա)

Աթլետիկա. կանայք, 4X100 փոխանցումավազք (VIDEO)
1. ԱՄՆ
2. Ճամայկա
3. Մեծ Բրիտանիա

Աթլետիկա. տղամարդիկ, 4X100 փոխանցումավազք (VIDEO)
1. Ճամայկա
2. Ճապոնիա
3. Կանադա

ArmFootball.com