Որոնել

 

Արխիվ

28.02.2012  03:49

Նորայր Մամեդով. «Հավաքականից ստացած հրավերն ինձ նոր ուժ տվեց»

Հոլանդական «Զվոլլեի» հայազգի հարձակվող Նորայր Մամեդովը իր խաղով գրավել է Հայաստանի հավաքականի գլխավոր մարզիչ Վարդան Մինասյանի ուշադրությունը, և վերջինս նրան ընդգրկել էր Հայաստանի հավաքականի ընդլայնված ցուցակի մեջ: Նորայրի թիմն այս տարի վստահորեն գլխավորում է Հոլանդիայի առաջին դիվիզիոնի մրցաշարային աղյուսակը և ամենայն հավանականությամբ մյուս տարի իրավունք կստանա հանդես գալու բարձրագույն խմբում: 20-ամյա հարձակվողն այս մրցաշրջանում մասնակցել է 19 հանդիպման և դարձել 5 գոլի հեղինակ: ArmFootball.com-ը բացառիկ հարցազրույց անցկացրեց Հայաստանի հավաքականի թեկնածուի հետ:

ՄԻՇՏ ԼՍՈւՄ ԵՄ ՍՐՏԻՍ

- Նորա'յր, քանի՞ տարեկանից ես զբաղվում ֆուտբոլով:

- Պրոֆեսիոնալ առաջին քայլերս արել եմ 13 տարեկանից` «Գրոնինգենի» մանկապատանեկան թիմում:

- Ի՞նչ հաջողությունների ես հասել ֆուտբոլային կարիերայիդ սկզբում:

- 17 տարեկան հասակում «Գրոնինգենի» պատանեկան թիմի կազմում դարձել եմ այդ տարիքային խմբի Հոլանդիայի չեմպիոն: Մասնակցել եմ ԱՄՆ-ում կայացած պատանեկան մրցաշարի, որտեղ գրավել ենք 2-րդ տեղը:

- Ո՞ր դիրքում ես նախընտրում խաղալ: Որո՞նք են քո խաղային ուժեղ հատկանիշները:

- Հարձակման գծում կարող եմ խաղալ ցանկացած դիրքում` և աջից, և ձախից, և որպես կենտրոնական հարձակվող: Հանդես եմ եկել նաև ենթահարձակվողի դիրքում: Տիրապետում եմ երկու ոտքով ուժեղ հարվածների, ունեմ մեկնարկային բարձր արագություն: Միշտ միտված եմ դեպի դարպասը:

- Ի՞նչն էր պատճառը, որ հեռացար «Գրոնինգենից»:

- Խաղում էի «Գրոնինգենի» սիրողական թիմում, երբ ինձ նկատեցին հիմնական թիմից և պայմանագիր առաջարկեցին: Մինչ պայանագիր կնքելը խոսեցի մարզչի հետ: Նա ասում էր, որ վստահելու է ինձ, սակայն ես զգում էի, որ նա անկեղծ չէր, դրանք ավելի շատ ակումբի տնօրենի խոսքերն էին: Այդ ժամանակ առաջարկ ստացա նաև «Զվոլլեից», և սիրտս հուշեց, որ ընտրեմ այդ տարբերակը: Ես միշտ լսում եմ իմ սրտին:

- Ի՞նչ կարգի թիմ է «Զվոլլեն», ի՞նչ հեռանկարներ ունի:

- «Զվոլլեն» մի քանի առաջ դուրս էր մնացել «Էրեդիվիզեից» (Հոլանդիայի բարձրագույն խումբ - AF) և այժմ ելույթ է ունենում առաջին դիվիզիոնում: Սակայն այս տարի թիմը վստահ է հանդես գալիս, և ես հույս ունեմ, որ մենք կդառնանք առաջին դիվիզիոնի հաղթող ու կվերադառնանք «Էրեդիվիզիե»: Ես հանդես եմ գալիս հարձակվողի դիրքում, իմ խնդիրը գոլեր խփելն է: Այս մրցաշրջանում դարձել եմ 5 գոլի հեղինակ:

ՀՊԱՐՏ ԵՄ, ՈՐ ՀԱՅ ԵՄ

- Մի փոքր պատմի'ր ընտանիքցդ:

- Հայրս և մայրս հայ են, և ես բնականաբար էլ մաքուր հայ եմ, ու հպարտանում եմ դրանով:

- Ամուսնացա՞ծ ես…

- Նշանված եմ, ապրում եմ նշանածիս հետ: Նա հայուհի է, և տանը մենք շփվում ենք հայերենով:

- Վարդան Մինասյանը քեզ ընդգրկել էր Հայաստանի հավաքականի կազմում` Սերբիայի և Կանադայի դեմ խաղերին մասնակցելու համար:

- Չեմ կարող բացատրել, թե ինչքան էի ուրախացել, երբ լսեցի հրավերի մասին: Սակայն առայժմ ես դեռ պատրաստ խաղալու հավաքականում: Երբ տարվա սկզբին ծնոտի վնասվածք ստացա, կորցրեցի տեղս հիմանական կազմում և հայտնվեցի պահեստայինների նստարանին: Այժմ նպատակ ունեմ ետ նվաճել այն, և նոր միայն պատրաստ կլինեմ կատարել այդ քայլը: Ես միշտ բերում եմ այս օրինակը. Հենրիխ Մխիթարյանը Չեմպիոնների լիգայում խաղում է Լիոնել Մեսսիի դեմ, իսկ ես նստած եմ «Զվոլլեի» պահեստայինների նստարանին: Ես պետք է գոնե հասնեմ իմ նպատակին, այնուհետև նոր կատարեմ այդ քայլը: Մոտակա ամիսները շատ կարևոր են ակումբի համար, մենք կարող ենք «Էրեդիվիզիեի» ուղեգիր նվաճել, և այժմ ինձ համար կարևոր է մասնակցել թիմի մարզումներին և հանդիպումներին:

- Ինչպե՞ս ընդունեցիր, երբ իմացար ֆեդերացիայի կողմից` քո հանդեպ ցուցաբերած հետաքրքրության մասին:

- Մի քանի ամիս առաջ ես այդպիսի բան պարզապես չէի պատկերացնում, իսկ երբ լսեցի ֆեդերացիայի հետաքրքրության մասին, շատ ուրախացա: Դա ինձ նոր ուժ տվեց, որ շարունակեմ սկսածս գործը և մեծ ֆուտբոլիստ դառնամ:

- Հետևե՞լ ես Հայաստանի հավաքականի վերջին հանդիպումներին:

- Անպայման: Հայաստանի հավաքականը շատ ուժեղ թիմ է, վերջին տարիների համեմատ շատ է առաջադիմել: Եթե թիմը շարունակի այսպես խաղալ, ապա ի վիճակի կլինի աշխարհի առաջնության ուղեգիր նվաճել:

- Հավաքական է հրավիրվել նաև Ամստերդամի «Այաքսի» կիսապաշտպան Արազ Օզբիլիզը: Ի՞նչ կարծիք ունես նրա վերաբերյալ:

- Ես Արազին լավ եմ ճանաչում, մենք իրար դեմ շատ ենք խաղացել: Նա շատ լավ, տեխնիկապես ուժեղ ֆուտբոլիստ է: Արազն, անկասկած, կուժեղացնի Հայաստանի հավաքականը:

ՖՈւՏԲՈԼԻ ՄԻՋՈՑՈՎ ՆՈՐ ՆՎԱՃՈւՄՆԵՐԻ ԿՀԱՍՆԵՆՔ

- Ի՞նչ երազանքներ ունես ֆուտբոլում:

- Այժմ երազում եմ խաղալ Իսպանական Պրիմերայում կամ գերմանական Բունդեսլիգայում: Եթե հասնեմ այդ նպատակին, ապա ուրիշ նպատակներ կդնեմ իմ առջև: Ամեն ինչ իր հերթին:

- Իսկ ո՞ր թիմերին ես երկրպագում:

- Սիրում եմ Մադրիդի «Ռեալի» և Դորտմունդի «Բորուսիայի» խաղը:

- Սիրածդ ֆուտբոլիստները…

- Կրիշտիանո Ռոնալդուն և Զլատան Իբրահիմովիչը: Այժմ ես վերջինիս ինքնակենսագրական գիրքն եմ կարդում, և շատ ընդհանուր բաներ եմ գտնում իմ և նրա միջև: Նա մեծ ֆուտբոլիստ է և մեծ անձնավորություն:

- Ի՞նչով ես սիրում զբաղվել ազատ ժամանակ:

- Երբեմն ընկերներիս հետ դուրսը ֆուտբոլ եմ խաղում, սիրում եմ նաև թենիս խաղալ: Տանը եղած ժամանակ սիրում եմ Playstation խաղալ` ՖԻՖԱ կամ Call of Duty:

- Կենդանիներ պահու՞մ ես տանը:

- Մենք շուն ենք պահում, անունը Բոյկա է, պիտբուլ է: Շատ եմ սիրում իրեն:

- Սոցիալական կայքերից օգտվու՞մ ես: Ինչքա՞ն ժամանակ ես հատկացնում դրան:

- Այդքան էլ շատ չեմ օգտվում: Երբեմն Թվիտերում եմ գրում, որպեսզի կարողանամ պատմել իմ մտածմունքները:

- Իսկ ի՞նչ է պատկերված ձեռքիդ դաջվածքի վրա:

- Պատկերված են վարդեր և հայերեն տառերով գրված են ինձ հարազատ մարդկանց անունների առաջին տառերը: Դա ինձ ուժ է տալիս:

- Ի՞նչ կմաղթես մեր կայքի այցելուներին և ընդհանրապես հայ ֆուտբոլասերներին:

- Առաջին հերթին առողջություն եմ մաղթում, դա ամենակարևորն է: Ցանկանում եմ, որ ֆուտբոլի միջոցով մենք նոր նվաճումների հասնենք: Իսկ ձեր այցելուներին ցանկանում եմ խնդրել` ինձ ժամանակ տալ, որ կարողանամ հայ ժողովրդի ֆուտբոլային ողջ կարողությունները ցույց տալ աշխարհին:

- Շնորհակալություն հետաքրքիր հարցազրույցի համար, հաջողություն ենք ցանկանում ֆուտբոլային կարիերայում և անձնական կյանքում, և հուսով ենք` շուտով կտեսնենք քեզ Հայաստանի հավաքականի մարզաշապիկով:

- Շատ շնորհակալ եմ:

 

Վլադիմիր Ղազարյան, ArmFootball.com

ArmFootball.com


Բարձրագույն խումբ

Թիմ Խ Մ
1 Ուլիս 5 13
2 Փյունիկ 4 9
3 Շիրակ 4 9
4 Գանձասար 4 7
5 Բանանց
4 4
6
Ալաշկերտ
5
4
7
Արարատ
5
3
8
Միկա 5 2

LIVESCORE.in

Soccerway.com

Armenia Map

Հարցում
Քվեարկել են (0)  |  Այլ հարցում
Ամենաընթերցվածը

ամիս

շաբաթ

օր

Բոլոր իրավունքները պաշտպանված են: © ArmFootball.com 2014
Մեջբերումներ անելիս հղումը «ArmFootball.com»-ին պարտադիր է:
Գովազդատուներին 095 04 54 06