Որոնել
Արխիվ
11.12.2019  15:52

Մելիքբեկյան. «Երբ խնդիր է լինում, ասում են մեղավոր է ՀՖՖ-ն. ստեղծելու ենք լիգա, որ ակումբները կառավարեն»

Հայաստանի ֆուտբոլի ֆեդերացիայի գլխավոր քարտուղար Արմեն Մելիքբեկյանը, ով առաջադրվել է ՀՖՖ նախագահական ընտրություններին, ArmFootball.com-ին հարցազրույց տվեց, որի ժամանակ անդրադարձավ բազմաթիվ թեմաների: Մելիքբեկյանին հանդիպեցինք ՀՖՖ-ի կազմակերպած մարզչական խոշոր սեմինարից հետո:

- Ինչպե՞ս անցավ սեմինարը:

- Երեք ամիս այս ծրագիրն էինք մշակում: Մեզ համար շատ կարևոր էր երկու այսպիսի միջոցառումներ անցկացնել` մեկը Դել Բոսկեի մասնակցությամբ էր, իսկ մյուսը` սա: Հաջորդ տարի սեմինարները բաժանելու ենք առանձին ուղղվածությունների (ֆուտբոլ, ֆուտզալ, կանանց ֆուտբոլ) և տարիքային խմբերի (մանկապատանեկան և պրոֆեսիոնալներ): Ըստ այդ խմբերի` հրավիրելու ենք արտասահմանցի, լուրջ մասնագետներ:

- Ցանկալի է, որ համեմատություն անցկացնեիք վերջին մեկ տարվա և Ռուբեն Հայրապետյանի նախագահական շրջաններում կատարած աշխատանքների միջև:

- Կցանկանայի, որ այդ համեմատությունը ֆուտբոլի մասին գրող լրագրողները կատարեին: Ինձ համար պարզ է, որ մենք դաշտ բացեցինք ակումբների համար, որ ծրագրեր իրականացնեն: Մի քանի հաջողված ծրագրեր կան, օրինակ, «Վանը» և «Վեսթ Արմենիան»: Մյուսների անունները չեմ տա, որովհետև շատերի մոտ խնդիրներ կան, սկսած ֆինանսականից: Տեսեք` ինչպես ֆուտբոլը հայտնվեց Չարենցավանում, դա մեծ նվաճում էր: Ունենք մանկապատանեկան ֆուտբոլի ներդրման ծրագիր, Գորիսում կառուցվում է ակադեմիա: Այժմ այնտեղ կառուցապատող ընկերության մոտ ֆինանսական խնդիրներ կան, բայց դրանք լուծելի են: Գումարած մարզչական ու կրթական այլ ծրագրեր, որոնք նոր են սկսում, բայց թափով են ընթանալու:

Միակ բանը, որ չեմ ընդունում, դա մեր տեխնիկական տնօրենի (Խինես Մելենդես-խմբ.) հետ կապված ծիծաղելի քննադատությունն է: ՈւԵՖԱ-ում բոլորը զարմացած են, որ նման մակարդակի մասնագետին կարողացել ենք Հայաստան հրավիրել: Նրան շատ երկրներից են հրավիրում, բայց նա Հայաստանում է: Մենք ինստիտուցիոնալ հիմք ենք դնում, և անկախ նրանից, թե ով կգա ու կգնա, կունենանք ֆուտբոլի համակարգ:

- Հայտարարել էիք, որ միայն ծայրահեղ դեպքում կառաջադրեք ձեր թեկնածությունը: Ի՞նչ տեղի ունեցավ, որ այդ ծայրահեղ պահը հասունացավ:

- Հասարակական կազմակերպությունների մի խումբ, որն աջակցում է այս մեկ տարում մեր թիմի կատարած բարեփոխումներին, չկարողացվ պայմանավորվել մեկ ընդհանուր թեկնածուի շուրջ, և զրույցների ընթացքում պարզվեց, որ ես նրանց համար բավականին ընդունելի թեկնածու եմ:

Բացի դրանից, արդեն վերջին օրերին բացահայտ դարձավ, որ Թովմաս Գրիգորյանի թեկնածությունը սատարում են ՀՖՖ-ի նախկին ղեկավարության ներկայացուցիչները և մասնավորապես Ռուբեն Հայրապետյանը: Դա երևաց բազմաթիվ գործոններով և անգամ չի էլ թաքցվում: Իմ տեղեկությամբ` Ռուբեն Հայրապետյանը հանդիպում է մարդկանց հետ: Իհարկե, յուրաքանչյուր կողմ կարող է հանդիպել և խոսել, բայց Ռուբեն Հայրապետյանը և նրա մարդիկ կոնկրետ այդ գործընթացի մեջ են: Չմոռանանք, որ Ռուբեն Հայրապետյանի պաշտոնավարման ամբողջ տարիների ընթացքում Թովմաս Գրիգորյանը եղել է ՀՖՖ գործադիր կոմիտեի անդամ և փաստացի աջակցել է այն գիծը, որը տարվել է: Վերջիվերջո, ֆուտբոլային հանրությունը և ակումբները դեմ դուրս եկան հենց այն բարքերին, որոնք նախկինում եղել են: Այդ պատճառով իմ թեկնածության հարցը սկզբունքային է:

Նշեմ, որ սա բացարձակապես Թովմաս Գրիգորյանի անձի դեմ թեկնածություն առաջադրում չէ: Ես անձերի դեմ չեմ պայքարում, այլ պայքարում եմ գաղափարների համար: Այդ գաղափարը ֆուտբոլի ամբողջովին բարեփոխումն է: Այս մեկ տարվա ընթացքում հնարավոր չէր իրականացնել այն ինչ ծրագրվել էր և նույնիսկ դաշտը մաքրել ավանդույթներից, որոնք ստեղծվել էին նախորդ երկար տարիների ընթացքում:

Խնդիրն այնպես է դրված, որ պատրաստակամ եմ վերջնականապես մրցակցային ու թափանցիկ դաշտ ապահովել և ամենակարևորը` ապահովել ՀՖՖ-ի ու ակումբների առանձին բարեկեցությունը:

- Թովմաս Գրիգորյանն ասաց, որ ձեզ առաջարկել է գնալ արձակուրդի:

- Արթուր Վանեցյանի հրաժարականից հետո նա ու Գործկոմի անդամներն ինձ վրա պաշտոնավարման պարտավորություն են դրել և ես շարունակելու այն կատարել: Ասեմ, որ ոչ մի կետում վարչական ռեսուրս չեմ օգտագործում և դրանով փակենք հարցը:

- Տեղեկություն եղավ, որ Արթուր Վանեցյանն Ալեքսանդր Գրիգորյանին է պատրաստվում նշանակել գլխավոր մարզիչ, վերջինս եկավ ֆեդերացիա, բայց արդյունքում Խաշմանյանը ստացավ այդ պաշտոնը: Այնուհետև եղավ 1:9 հաշվով պարտություն: Ի՞նչ է ֆեդերացիայում կատարվել այդ ընթացքում:

- Նախ, ես և Արթուր Վանեցյանը դեմ էինք, որ Արմեն Գյուլբուդաղյանցը հեռանա, բայց դա տեղի ունեցավ: Հետագա ընթացքը ես այլ կերպ էի պատկերացնում: Աշխարհում գոյություն ունի ընթացակարգ, թե ինչպես վարվել, երբ մարզիչը հրաժարական է տալիս մրցաշարի մեկնարկում, միջնամասում կամ վերջերում, բայց տեղի ունեցավ տակտիկական սխալ: Այնուամենայնիվ, սխալ է նման պարտությունն առանձին բարդել մարզչի, ֆուտբոլիստների կամ ֆեդերացիայի վրա: Վստահեցնում եմ, որ մեր օրոք այլևս նման բան չի լինի:

- Եթե մնաք ֆեդերացիայում, ի՞նչ է լինելու Ազգային հավաքականի գլխավոր մարզչի հարցը:

 - Նախագահ դառնալու դեպքում չեմ պատրաստվում ինքնուրույն որոշել գլխավոր մարզչի հարցը, անկախ նրանից, որ կանոնադրությամբ այդ իրավասությունն ունենալու եմ: Գլխավոր մարզչի հարցը քննարկելու եմ տեխնիկական տնօրենի հետ և որոշումը դնելու եմ Գործկոմում: Եթե Գործկոմը որոշի, որ Խաշմանյանն է մնալու գլխավոր մարզչի պաշտոնում, նա կմնա, եթե ոչ` կխոսեմ մարզչի հետ: Այս պահին նա գործող պայմանագիր ունի:

- Քաղաքական ընտրություններում սովորաբար ասում են` «ի՞նչ թիմով եք գալիս»: Ովքե՞ր են կարևոր պաշտոններ ստանձնելու ֆեդերացիայում, եթե դուք ընտրվեք:

- Մեր թիմն ունենք, որի հետ աշխատել եմ 1 տարի: Այդ թիմն ապացուցել է, որ բազմաթիվ կետերում առաջընթաց կա: Դա արձանագրվել է նաև ՈՒԵՖԱ-ի կողմից: Հատկապես Մ19 Եվրոպայի առաջնությունն անցկացնելու շնորհիվ: Դա լավ փորձարկում էր ՈՒԵՖԱ-ի համար, թե Հայաստանն ինչպիսի մրցաշար կարող է անցկացնել: Լավ գնահատական ենք ստացել: Իհարկե, համալրումներ նույնպես կլինեն, բայց գլխավոր քարտուղարության հետ աշխատող այս կազմը մնալու է և այլ ծրագրեր է իրականացնելու:

- Մինչև ընտրությունները, Ձեր ծրագիրը ներկայացնելո՞ւ եք հանրությանը:

- Մենք ունենք ռազմավարական ծրագիր, որի օգտին ՀՖՖ ժողովի անդամները քվեարկել են ամռանը: Եթե այն փոփոխելու ցանկություն ունենայի, ապա պետք է ներկայացնեի ժողովին և փաստարկներ ներկայացնեի: Մեր ծրագիրը կոնկրետ չափերի նպատակներ է դրել. խաղադաշտերի կոնկրետ քանակ, ֆուտբոլիստների թվի ավելացում, նոր մրցաշարեր: Բացի մեր ռազմավարական նպատակները, կարևորագույն կետը, որով գալու եմ ընտրությունների, դա պրոֆեսիոնալ լիգայի ստեղծումն է: Դա իմ առաջին ու կարևորագույն նպատակն է: Առավելագույնն եմ անելու, որ Բարձրագույն ու Առաջին խմբի ակումբների հետ քննարկենք ու ստեղծենք պրոֆեսիոնալ լիգա: ՀՖՖ-ն իր ղեկավարության տակ ամենաշատը կարող է Հայաստանի գավաթի խաղարկությունը թողնել, ինչպես ամբողջ աշխարհում է, իսկ ներքին առաջնությունը պետք է կառավարվի հենց ակումբների կողմից: Այդ լիգան պետք է կառավարի ստացած եկամուտները և ռիսկերը:  Մենք նրանց առաջարկելու ենք հնարավորինս շուտ միմյանց միջև պայմանավորվել, իսկ եթե ոչ, նրանց այդ հարցում կօգնի ֆեդերացիան` հիմնվելով միջազգային փորձի վրա:  Այժմ հենց խնդիրներ են լինում, ասում են մեղավոր է ֆեդերացիան: Երբ պրոֆեսիոնալ լիգա կլինի, նրանք ինքները կկառավարեն և  այդ ժամանակ կհասկանան խնդիրները` միգուցե ավելի էֆֆեկտիվ լուծում գտնելով: Իսկ ֆեդերացիան կզբաղվի մանկապատանեկան ու մարզային ֆուտբոլի զարգացմամբ, ինչպես նաև և ազգային հավաքականներով:

- Երբ Արթուր Վանեցյանը հրաժարական տվեց, նշեց, որ փոքր խաղադաշտերի կառուցումը և մարզային ֆուտբոլի զարգացման ծրագիրը շարունակվելու է, նույնիսկ, եթե ՀՖՖ-ի ներկայիս ղեկավարությունը նույնպես հեռանա: Ինչպե՞ս եք դա պատկերացնում:

- Առաջին հերթին հեռանալու հավանականությունը շատ փոքր է: Երկրորդ` փոքր դաշտերի և մարզային ֆուտբոլի զարգացման ծրագիրն օդից չի ընկել:  Դա գիտական մոտեցման արդյունք է: Բոլոր մարզերում հետազոտություն է կատարվել, վերլուծվել են բաց աղբյուրներից ստացված բոլոր տվյալները, նույնիսկ երեխաների աղքատության ինդեքսը և ըստ դրա որոշվել է, թե այդ խաղադաշտերը որտեղ են կառուցվելու: Այդ վայրերի մասնակցությամբ հետագայում մարզերի առաջնություններ և ֆուտբոլային փառատոններ են անցկացվելու: Այնպես չէ, որ գնացինք, տեսանք գյուղը սիրուն է և որոշեցինք այնտեղ կառուցել: Սա լուրջ ծրագիր է և ես լավ եմ պատկերացնում, թե ինչպես այն ավարտին հասցնել: Մենք այս տարի 1,5 միլիոն դոլարի ներդում ենք կատարել 50 հեկտար տարածքում: Հաջորդ տարի ավելի արագ ենք աշխատելու, որովհետև արդեն թղթաբանական և այլ հարցերում ավելի լավ գիտենք, թե ինչպես գործել:

- Մարզչական իրարանցման ժամանակ զգացվեց, որ տարաձայնություններ կան Ձեր և Արթուր Վանեցյանի միջև: Ե՞րբ դա սկսվեց և ինչո՞ւ:

- Անկեղծ կպատասխանեմ: Անձնական մակարդակում շատ լավ հարաբերությունների մեջ ենք, բացարձակ խնդիրներ չկան: Ես ոչինչ գաղտնի չեմ անում: Բոլոր քննարկումների ժամանակ, երբ համաձայն չէի լինում, ասում էի դա և մնում էի իմ կարծիքին: Կարծում եմ` դա աշխատելու ազնիվ ձև է: Եթե մի բանի շուրջ համաձայն չեմ, այդ մասին ասում եմ իմ վերադասին: Մնացածը վերադասի տիրույթում է: Եղել են դեպքեր, երբ Վանեցյանը գտել է, որ ես ճիշտ եմ, իսկ երբեմն էլ` ինքնուրույն է լուծել այդ հարցը: Տարաձայնություններ չեն եղել:

- Կան մարդիկ, ովքեր փորձում էին ազդել Վանեցյանի որոշումների վրա:

- Միշտ կան մարդիկ, ովքեր փորձում են ազդել Վանեցյանի, իմ կամ մյուս աշխատողների որոշումներ վրա: Ֆուտբոլում միշտ այդպես է: Կան խմբեր, ովքեր ուզում են իրենց համար ցանկալի որոշում լինի: Ամենակարևորն այն է, որ ստեղծենք համակարգ, որ այդ ազդեցությունները չլինեն կամայական: Համակարգի դեպքում կլինեն փաստարկված նախադեպեր և մենք ցանկացած իրավիճակում կիմանանք, թե ինչպես է պետք աշխատել: Այդ ժամանակ ոչ իմ կամ մեկ ուրիշի կամայական կարծիքներն ազդեցություն չեն ունենա: 

- Հարց ընտրությունների մասին: Այսպես կոչված «ֆեյք» ՀԿ-ները քվեարկելո՞ւ են ընտրությունների ժամանակ, թե` ոչ:

- Դա ՀՖՖ ժողովն է որոշելու: Կարծում եմ` ժողովը բոլոր փաստերին ծանոթանալով ճիշտ որոշում կկայացնի: Չեմ կարծում, թե ժողովի անդամների մեջ կա մեկը, ով չի երազում ստանալ այն ֆուտբոլը, որին հասնելու համար մեկ տարի առաջ պահանջում էին Ռուբեն Հայրապետյանի հրաժարականը:

- Բայց արդեն որոշ ՀԿ-ների գործունեությունը կասցվել է:

- Դա արդեն ՀՖՖ գործկոմի կողմից է և այդ կասեցումը նշանակում է կասկած հայտնել տվյալ ՀԿ-ի գործունեության վերաբերյալ: Վերջնական որոշում կայացնելու է ՀՖՖ Ժողովը: Կասեցման գործընթացները դեռ կարող են շարունակվել մինչև ընտրությունները, որովհետև մինչև ընտրությու նները դեռ Գործկոմի այլ նիստեր են նախատեսված:

- Առաջին խմբում մեծ քանակությամբ լեգիոներներ կան, որոնց մեծ մասի կենսագրությունը նախկինում կասկածելի է եղել, նաև՝ «Երևան» ՖԱ (Բարձրագույն խումբ. - խմբ), որի վերաբերյալ խիստ կասկածներ կան, թե այդ թիմը կապված է պայմանավորված խաղերի հայտնի կազմակերպչի հետ։ Առհասարակ, Արթուր Վանեցյանի նախագահության օրոք ինչ-որ քայլեր ձեռնարկվե՞լ են՝ հաշվի առնելով, որ նա նաև ԱԱԾ տնօրենն էր։

- Դա նախաքննական գաղտնիք է, որովհետև կա հարուցված քրեական գործ։ Շատ բան չեմ կարող ասել, բայց ՀՖՖ-ն, ես՝ անձամբ, կոնկրետ զբաղվել է դրանով։ Ձեր գրած հոդվածը ես կարդացել եմ, և այնտեղ շատ բան համապատասխանում է իրականությանը, բայց Դուք օգտվել եք բաց աղբյուրներից։ Մենք նույնպես օգտվել ենք բաց աղբյուրներից, բայց, նաև, ունենք տվյալներ հարակից ֆեդերացիաների հետ զրույցներից, որոնք մեզ տրամադրել են տեղեկություն և այլն։ Ես այս պահին չեմ կարող բացահայտել այդ ամենը, բայց գործընթացը շարունակվում է և սա այն աշխատանքն է, որը պարտավոր ենք տանել։ Կարծում եմ՝ սա ամենալուրջ խնդիրն է, որ ծառացած է հայկական ֆուտբոլի առջև և գործընթացի ավարտից հետո հնարավորություն կունենամ շատ բաց խոսել ամեն ինչի մասին, բայց վստահ եմ, որ խնդիրը, միանշանակ, լուծում է ստանալու։

- Առհասարակ, ինչ-որ կերպ հնարավո՞ր է Առաջին խմբին հեռու պահել նման իրավիճակներից։

- Այո, մեխանիզմներ կան, և դրանք կիրառելի են։ Երբ ասում ենք Առաջին խումբ, ցավոք, ստվեր ենք գցում բոլոր ակումբների վրա։ Առաջին խմբում անգամ կեսին մոտ չեն այն ակումբները, որոնց նկատմամբ կան կասկածներ։ Կան թիրախային կետերը, որոնց կարելի է կասկածել, բայց, երբ այդ գործընթացն ավարտվի՝ կլինեն կոնկրետ մեխանիզմներ, որոնք կխոչընդոտեն նման ակումբների ստեղծմանը։

- Ի՞նչ կասեք սիրողական ֆուտբոլի, սիրողական լիգայի մասին։

- Այս տարվա ընթացքում զբաղվել ենք սիրողական լիգայով։ Ունենք մի քանի նախագծեր, տարբեր լիգաների ինտեգրում, մարզային առաջնությունների ստեղծում, որի նախագիծն արդեն պատրաստ է տեխնիկական տնօրինության կողմից, և հուսով ենք, որ մարտից կսկսենք գործընթացը։ Ունենք նաև սիրողական նախագիծ գերատեշչությունների միջև առաջնությունների հետ կապված։ Սիրողական տարբեր առաջնություններ կազմակերպելուց հետո մենք ցանկանում ենք հաղթողներին միավորել մեկ լիգայում և մրցաշար անցկացրնել։ Խոսքը փոքր լիգաների մասին է, որը հետագայում կմոդիֆիկացվի և մեծ լիգա կդառնա։ Դա ոչ թե խմորման փուլում է, այլ հաջորդ տարի այդ մրցաշարերի շարքը կլինի։ Կհավաքենք հաղթողներին և կփորձենք հասկանալ հաջորդ քայլերը։

- Եթե դա լինի՝ ֆեդերացիան ավելի լու՞րջ կզբաղվի սիրողական լիգայով՝ համարելով ինչպես, օրինկակ, երրորդ դիվիզիոն։

- Իհարկե, սիրողական մրցաշարեր կազմակերպելն ամենահաճելին է ֆուտբոլում, որովհետև այն մեծ մասսայականություն է վայելում։ Կարծում եմ՝ մեզ մոտ հեռանկարներ կհայտնվեն, երբ Առաջին խումբն ու Բարձրագույն խումբը հեռանան մեզանից ու ավելի լայն տարածք ունենանք աշխատելու։ Դա շատ մեծ ռեսուրս է խլում, հասկանում եք։

- Հարց, որը սկզբում շատ էր քննարկվում, իսկ հիմա ընդհանրապես քննարկումներ չկան։ Խոսքը նոր մարզադաշտի կառուցման մասին է։

- Քննարկումները մարեցին, որովհետև, երբ կար ներդրող, որի հետ կարելի էր սկսել բանակցել՝ տեղ չգտնվեց։ Հիմա մենք պատրաստում ենք մեծ նախագիծ և պատրաստվում ենք քննարկումներ անցկացնել կառավարության հետ։ Այսինքն՝ հստակ ներկայացնել մեր նախագիծն ու կառավարության հետ որոշել՝ արդյո՞ք ՀՀ-ն պատրաստ է դրան, ինչ տիպի ներդրող է պետք, և առարկայական քննարկումներ կատարել։ Այդ անգամ ինչ-որ բան չստացվեց, բայց այս գաղափարը պետք է խմորել և ամեն ինչ անել դրա իրագործման համար։ Մեր երկրին պետք է ազգային ստադիոն։ Պետք է այնպիսի վայր, որտեղ, առնվազն, կարող են 30 հազար հոգի հավաքվել և դիտել ազգային հավաքականի խաղերը։ Սա կարևորագույն խնդիր է, սակայն այն միայն ՀՖՖ-ի իրավասության ներքո չէ։ Կան նախադրյալներ, որ ֆեդերացիան կկարողանա ներդրողներ գտնել և պետության հետ համատեղ իրականացնել այդ ծրագիրը։

- Անցնենք վերջին շրջանում Ձեր հասցեին հնչած մի շարք մեղադրանքներին։ Նախ, շատ է խոսվում Խինես Մելենդեսի (ՀՖՖ տեխնիկական տնօրեն), նրա աշխատավարձի, կատարած գործունեության, օգնականների մասին։ Մասնավորապես, խոսվում է երիտասարդական հավաքականի գլխավոր մարզչի մասին, ով, ըստ լուրերի, ինչ-որ փուլում արձակուրդ է գնացել խաղերից առաջ։

- Երիտասարդական հավաքականի մարզիչը ոչ մի փուլում արձակուրդ չի գնացել խաղերից առաջ։ Մ17 հավաքականի մարզիչն է մի պահ հիվանդ եղել և կարճաժամկետ արձակուրդ վերցրել։ Ես ընդհանրապես չեմ ցանկանում քննարկել այդ թեման, որովհետև այն ծիծաղելի է։  Երբ հրավիրում ես մասնագետ, որը լավագույններից է Եվրոպայում՝ փաստացի ճանաչված ՈւԵՖԱ-ի կողմից երիտասարդ ֆուտբոլիստների պատրաստման գործում, այլ բաղադրիչների մասին խոսելն ավելորդ է։ Տարբեր տարիքային հավաքականների առջև տարբեր խնդիրներ են դրվում և մոդելը միանգամից չի կերտվում։ Ես, իսկապես, գոհ եմ Մելենդեսի աշխատանքից, և այս կարծիքը կկիսեն նաև այն մարզիչները, ովքեր նրա հետ աշխատում են, այլ թիմերի մարզիչները, որոնք շփվում են Մելենդեսի հետ։ Աշխատավարձի մասին խոսելը նույնպես ծիծաղելի է, որովհետև, եթե մասնագետ ես բերում, ապա պետք է վճարես նրան համապատասխան՝ ինչքան ստանում է իր երկրում, նույնիսկ, մի փոքր՝ ավելի։ Ես շատ տարբեր թվեր եմ լսել՝ կապված Խինես Մելենդեսի աշխատավարձի հետ, երբեմն՝ շատ աբսուրդային։ Սա անձնական տիրույթ է և գաղտնիք է, որը չի կարելի բացահայտել, բայց հավատացնում եմ, որ նա տասնապատիկ ավելի մեծ ներդրում է ունենում ծրագրեր գրելու և ապագա ստեղծելու առումով, փաստաթղթային բազա ստեղծելով, քան մենք դա կարող էինք գնել։ Երևի, այդքան գումար չէինք կարող ունենալ, որպեսզի գնենք պատրաստի ծրագրեր։ Կան ընկերություններ, որոնք վաճառում են նման ծրագրեր։ Այլ երկրների մասնագետներ շատ ավելի մեծ գումարներ էին պահանջում Հայաստան գալու համար։ Օրինակ՝ հյուսիսային կամ արևելյան Եվրոպայի երկրների մասնագետները, քան՝ Մելենդեսը, ով ՈւԵՖԱ-ի կողմից ճանաչվել է լավագույններից մեկը։

- Նաև խոսվում է, որ ֆան-ակումբներից մեկը հովանավորվել է ֆեդերացիայի կողմից։ Հատկապես, մյուս ֆան ակումբը շատ է բողոքում՝ շոշափելով Ձեր անունը։

- Ֆինանսական հոսքերի, ֆան-ակումբների բոլոր գործառույթների առումով ես երբևէ միանձնյա որոշում չէի կարող կայացնել։ Կա կանոնադրությամբ ամրագրված կետ, թե ով ինչ է տնօրինում ֆեդերացիայում։ Արթուր Վանեցյանը և ես տեղյակ ենք եղել։ Մենք համատեղ քննարկել ենք, և նա իմացել է բոլոր ծախսերի մասին, որոնք արվել են ՀՖՖ-ում, նաև, կապված Խինես Մելենդեսի հետ։ Բնականաբար, դուք հասկանում եք, որ Վանեցյանը հանդիպել, բանակցել և համաձայնություն է տվել Մելենդեսի գալուն։ Նույնը կապված է նաև այս հարցերի հետ, այնպես որ, ես այս հարցը փակված եմ համարում։ Կարծում եմ՝ բոլոր այն ծախսերը, որոնք հաստատել է Արթուր Վանեցյանը և մենք իրականացրել ենք՝ նպատակային են եղել։

- Խոսենք, կոնկրետ, Red Eagels  ֆան-ակումբի մասին։ Ասում են, որ իրենց գործունեությունը խոչընդոտվել է։

- Ես նրանց հետ բացարձակ խնդիր չեմ տեսել։ Մենք նրանց տրամադրել ենք նույն ստարտային պայմանները, ինչպես՝ մյուս ֆան-ակումբին։ Խնդիրը եղել է կապված քրեական գործի հետ։ Կա քրեական գործ, որի մասին, դարձյալ, այս պահին չենք խոսի, բայց կա կոնկրետ մեղադրանք և անձից եկած նամակ, որտեղ ասվում է, թե ՀՖՖ-ին խոշոր չափի վնաս է հասցվել։ Երբ գործը կավարտվի՝ մենք բոլոր հարցերը կքննարկենք։ Վստահեցնում եմ, որ նրանց նկատմամբ ոչ մի անհատական վերաբերմունք չկա և չի եղել։ Խնդիրները ծագել են կապված քրեական գործի հետ։

- Հարց՝ կապված Գյումրիի աղջիկների թիմի հետ։ Մարզիչը նշում է, որ իրենց Բողոքարկման կոմիտեն թույլ է տվել մասնակցել առաջնությանը, բայց ՀՖՖ-ից դեռ ոչ մի պատասխան չեն ստացել։

- Նրանք պատասխան ստացել են։ Ես չեմ մասնակցել ոչ Կարգապահական կոմիտեի, ոչ էլ Բողոքարկման կոմիտեի որոշումներին, որոնք անկախ մարմիններ են։ Այնպես որ, այդ հարցն ինձ չի վերաբերում։ Գիտեմ, որ նամակ է ուղարկվել, որտեղ հավաստիացվել է, որ համաձայն Բողոքարկման կոմիտեի որոշման նրանք մասնակցելու են առաջնությանը։ Բայց, քանի որ, առաջնությունում արդեն անցել էր 4-5 տուր՝ կմասնակցեն յուրաքանչյուր այլ մրցաշարի, որը կսկսվի, իսկ առաջնությանը՝ հաջորդ մրցաշրջանից։ Եղել է այդպիսի պատասխան և այդ թեմային հետագայում կանդրադառնանք, որը չարեցինք այս թոհուբոհի ընթացքում։ Ոչ ոք թող իրեն որպես զոհ չներկայացնի, որովհետև ֆեդերացիան միայն աջակցող մարմին է և յուրաքանչյուր մարդու գործունեությունից է կախված, թե ինչ չափով համագործակցային կլինի ֆեդերացիան։ Եթե չեն ցանկանում համագործակցել, վիրավորում ու խախտում են այն նորմերը, որոնք գոյություն ունեն համատեղ աշխատանքում՝ ֆեդերացիան ոչինչ չի կարող անել։ Մարդիկ պետք է ցանկանան աշխատել ՀՖՖ-ի հետ։ Մենք բաց ենք, պատրաստ և այս մեկ տարվա ընթացքում մեզ հետ աշխատող գրեթե ոչ մի մարմնի հետ խնդիրներ չեն ծագել։

- Կա նաև անձնավորված քննադատություն կոնկրետ Սուրեն Բաղդասարյանի կողմից։

- Չեմ ցանկանում անդրադառնալ դրան, որովհետև, ինձ թվում է, թե դա ուղղորդված կամ անձով պայմանավորված քննադատություն է։ Այն բացարձակապես լուրջ չէ և ոչ մի կետում չեմ ցանկանում անդրադառնալ։ Միայն դեստրուկտիվ, կոնստրուկտիվությունից զուրկ քննադատություն է։

- Խոսելով Խինես Մելենդեսի ծրագրի մասին՝ հենց ինքն է շատ նշում, որ ակումբները պետք է ցանկանան ծրագիրը ներդնել իրենց մոտ։ Եթե ակումբները չցանկանան անել՝ ի՞նչ է լինելու։

- Դա բավականին լուրջ խնդիր է։ Այլ մեխանիզմներ կան, համերաշխության վճարման մեխանիզմներն այլ կլինեն, բայց ես կզարմանամ, եթե ակումբները չցանկանան դա ներդնել։ Բոլոր մասնագետները, որոնք գալիս են մեզ մոտ՝ նշում են, որ ծրագիրը լավն է։ Այն փորձարկվել է Վարդան Բիչախչյանի կողմից՝ «Շիրակում»։ Կարծում եմ՝ նա լավ մասնագետ է և կարելի է նրա կարծիքին վստահել։ Փորձնական ծրագիրն արվել է «Շիրակում», որովհետև այդ ակումբը ցանկություն հայտնեց։ Հիմա այն ներդրել ենք պատանեկան հավաքականում և շարունակելու ենք արդեն ավելի ցածր տարիքային ակադեմիաների թիմերում։ Մենք անվճար տրամադրում ենք ծրագիր, որն ակումբները չունեն։ Այն ակումբը որն ունի ծրագիր՝ թող շարունակեն աշխատել իրենց ծրագրով։ Մենք, անգամ, կարող ենք համադրել այդ ծրագրերը և հասկանալ տարբերությունները։ Ծրագիր կազմելու ընթացքում Մելենդեսը բոլորին հրավիրել և ներկայացրել է այն, իսկ հիմա դեկտեմբերի 6-7-ին Առաջին և Բարձրագույն խմբի ներկայացուցիչներն են առանձին հրավիրվել, նա բացատրել է պատրաստի ծրագիրն ու առաջարկել է վերցնել։ Մենք կրիչների վրա կտանք բոլոր ցանկացողներին այդ ծրագիրը՝ հնարավորություն տալով օգտվել դրանից։ Կարծում եմ՝ այս գույքագրումը մեկ ամսից կավարտենք և կհասկանանք, թե որ ակումբն է ցանկանում, որը՝ ոչ։ Վստահ եմ, որ ակումբների մեծամասնությունը, եթե ոչ՝ բոլորը, կցանկանան աշխատել դրանով, որովհետև պատրաստի ծրագիր է։ Բոլոր վարժությունները ոչ միայն նկարագրված են, այլ նաև տեքստով են ներկայացված։ Կա նաև բոլոր վարժությունների տեսագրությունը։ Կիրառման ձևերում էլ Խինես Մելենդեսը պատրաստ է աջակցություն ցույց տալ։ Հիմա պատրաստվում է նաև նմանատիպ ֆիթնես-ծրագիր երեխաների ֆիզիկական պատրաստվածության համար։ Այն կներկայացվի հաջորդ տարի։

- Հետաքրքիր է «Փյունիկի» և «Ուրարտուի» տեսակետներն այս հարցի վերաբերյալ։ Տեղյա՞կ եք։

- Նրանց հետ վերջին հանդիպումը եղել է դեկտեմբերի 7-ին։ Քանի որ մենք նախապատրաստում էինք մարզչական սեմինարը՝ չեմ հասցրել այդ մասին խոսել Խինես Մելենդեսի հետ։ Վաղը կհանդիպենք և ակումբների մոտեցումների մասին կտեղեկանանք։

- Խոսենք մրցավարությունից։ Ի՞նչ կարծիք ունեք Միխալ Լիստկևիչի (ՀՖՖ մրցավարական բաժնի ղեկավար․ խմբ) գործունեության մասին Հայաստանում և, ընդհանրապես, մրցավարության վիճակի մասին։

- Ակումբները միշտ մրցավարություննից դժգոհ են։ Ոչ մի ակումբ չի խոսում այն մրցավարներից, որոնք իրենց օգտին սխալ են թույլ տվել։ Մրցավարները սխալներ անում են բոլոր ակումբների օգտին և՝ դեմ։ Մրցավարությունը լրջագույն խնդիր է։ Լիստկևիչն այստեղ 4-5 ամիս է աշխատում և խնդրի լուծման նոր տարբերակներ ենք որոնում։ Այս առումով նույնպես ունենք լայն ծրագրեր։ Ունենք համագործակցության հուշագրերի կնքում տարբեր երկրների հետ։ Մասնավորապես, ունենք VAR-ի նոր համակարգող, այսինքն, շատ ակտիվ սկսում ենք աշխատել այդ ուղղությամբ։ Խոսքը ոչ թե տեխնիկական հագեցվածության առումով է, որը հենց այդ մարդիկ են լուծելու, այլ՝ կապված մրցավարների կրթության հետ։ Նախապատրաստում ենք Եվրոպայից հրավիրել VAR-ի լավագույն մարզիչներին, որոնք նախնական տեղեկություններ կհաղորդեն, թե ինչպես է այն աշխատում, իսկ հետագայում, մինչև ներդրվելը, նրանց ուղարկելու ենք VAR համակարգով գործող առաջնություններ, որպեսզի նստեն այդ սենյակում և տեսնեն, թե ինչպես է գործածվում։ Ստեղծել ենք ՀՖՖ մրցավարների ակումբ։ Այնտեղ ընդգրկվել են երիտասարդ, տաղանդավոր մրցավարներից 7-ը, որոնք աշխատում են ավելի ինտենսիվ։ Այդ խումբը մեծանալու միտում ունի։

Մրցավարների հետ կապված խնդիրները համակարգային ու տարիներ ի վեր եկած են և միանգամից լուծում չեն ստանալու։ Խոսում ենք այն մասին, որ չլինի միտում և աշխատում ենք դրա վրա, բայց այն, որ հաջորդ մրցաշրջանում կունենանք կոնկրետ փոփոխություններ՝ փաստ է։ Նաև փաստ է, որ երիտասարդ մրցավարներին սկսել ենք շատ մեծ տեղ տալ։ Գուցե սխալներ էլ են լինում, բայց այդպես է, մրցավարը պետք է փորձ հավաքի։ Եթե երիտասարդներին չվստահենք, նրանց անջրպետը փորձառուների միջև միշտ կունենանք։ Կարծում եմ, որ բարդ ճանապարհ է, բայց աշխատանքներ կատարվում են և գալիք տարիների ընթացքում լրջագույն փոփոխություններ կունենանք։

- Պրոֆեսիոնալ լիգա ստեղծվելու դեպքում մրցավարությամբ կրկի՞ն զբաղվելու է ֆեդերացիան։

- Սովորաբար, մնում է ֆեդերացիային, որովհետև այլ տարբերակ չկա։ Բայց, դա նույնպես կախված է նրանից, թե ինչ պայմանավորվածություններ ձեռք կբերվեն։

- Այսինքն, եթե պրոֆեսիոնալ լիգա լինի՝ միևնույնն է, մրցավարական սխալների համար բողոքելու են ՀՖՖ-ից ։

- Եթե մենք ամեն ինչ բացատրենք ակումբներին և միասին ձևավորենք մեխանիզմները՝ հուսանք, որ շատ ավելի հեշտ կլինի։ Այնուամենայնիվ, նրանք չեն բողոքի անցկացման վայրից, գումարների բաշխումից, ժամերը փոփոխելու հարցից։ Այդ ամենը կլինի նրանց տիրույթում։

- Անկախ ամեն ինչից, երկրպագուները ֆեդերացիայի գործուներությունը սովոր են գնահատել ազգային հավաքականի արդյունքներով։ Արդյո՞ք պատրաստ եք դրան նախագահ դառնալու դեպքում։

- Ես ցավում եմ դրա համար։ Ֆուտբոլը միայն ազգային հավաքականը չէ։ Ես դա միշտ եմ ասել։ Այնուամենայնիվ, կարծում եմ, որ իրավիճակի փոփոխություն կլինի, որովհետև ամեն ինչ կունենա իր բացատրությունը։ Մեր յուրաքանչյուր քայլ ավելի լավ կբացատրվի։ Այս մեկ տարվա փորձը ցույց տվեց, որ, գուցե, ինչ-որ բաներ լավ չեն բացատրվել։ Ներսում մտածել ենք, որ արագ առաջընթաց ենք ունենում, բայց բացատրելն էր խնդիրը։ Բացի այդ, պետք է գտնենք օպտիմալ տարբերակ մեր տարբեր տարիքային խմբերի հավաքականները զարգացնելու համար։ Հատկապես, դա վերաբերվում է պատանեկան հավաքականներին։ Ազգային հավաքականի դեպքում էլ ես կրկնում եմ, որ նման պարտություն այլևս չի կրկնվի։


Ռաֆայել Խալաթյան

ArmFootball.com


Soccerway.com

Հարցում
Քվեարկել են (0)  |  Այլ հարցում
Բոլոր իրավունքները պաշտպանված են: © ArmFootball.com 2020
Մեջբերումներ անելիս հղումը «ArmFootball.com»-ին պարտադիր է:
Գովազդատուներին 055 516 000