Որոնել
Արխիվ
03.09.2019  17:05

Ըմբշամարտ. Էդուարդ Սահակյան. «Արսենը ցանկություն չհայտնեց մասնակցել հավաքին, նա իր մարզումներն այլ կերպ է պատկերացնում այս պահին»

Հունահռոմեական ոճի ըմբշամարտի Հայաստանի հավաքականի գլխավոր մարզչի պաշտոնակատար Էդուարդ Սահակյանը Ղազախստանում անցկացվելիք աշխարհի առաջնության կազմը ներկայացնելուց հետո ճեպազրույց է ունեցել լրագրողների հետ, հայտնում է ՀԱՕԿ պաշտոնական կայքը:

Նա պարզաբանել է, որ Բելառուսում գտնվող «Ստայկի» մարզաբազայում տեղի ունեցած փորձամրցման արդյունքով որոշվել է, որ աշխարհի առաջնության 77 կգ քաշային կարգում Հայաստանը կներկայացնի Կարապետ Չալյանը.

«Թիմը այս պահին նորմալ ֆիզիկական և ֆունկցիոնալ վիճակում է: ԱԱ-ից առաջ վերջին շաբաթն է, թիմը հավաք է անցկացնում, իսկ մնացած հարցերի պատասխանը կտա մրցումը: Բնականաբար, Լևոն Ջուլֆալակյանից հետո թիմի ղեկը ստանձնել դժվար էր, այդ մասին երկրորդ կարծիք չկա: Մենք մարզիչներով այս պահին աշխատում ենք այնպես անել, որ թիմը «թափից» չընկնի և կարողանա լավ հանդես գալ աշխարհի առաջնությունում»,- ասաց մարզիչը:

Հարցին, թե ինչու թիմի հետ չի մարզվում Արսեն Ջուլֆալակյանը, Էդուարդ Սահակյանը պատասխանել է.

«Արսենը ցանկություն չհայտնեց մասնակցել հավաքին, նա իր մարզումներն այլ կերպ է պատկերացնում այս պահին: Մենք շատ կցանկանայինք, որ նա մասնակցեր այս հավաքին»: Սահակյանի խոսքով, Արսեն Ջուլֆալակյանի և Կարապետ Չալյանի փորձամրցման ժամանակ մարզիչների համար էական չի եղել, թե ով կհաղթի: «Տվյալ պահին այս էր իրավիճակը, և այսպիսի լուծում տրվեց: ԱԱ-ից հետո նոյեմբեր-դեկտեմբերին կանցկացվի Հայաստանի առաջնություն, որից հետո պարզ կլինի, թե ովքեր կհամալրեն հավաքականի կազմը»,-ասաց Էդուարդ Սահակյանը:

87 կգ քաշային կարգում Մաքսիմ Մանուկյանի եւ Արթուր Շահինյանի մրցակցության մասին հավաքականի գլխավոր մարզչի պաշտոնակատարն ասել է.

«Մրցաշարերը ցույց տվեցին, որ Մաքսիմը պատրաստ է հանդես գալ 82 կգ քաշային կարգում, իսկ Արթուր Շահինյանը՝ 87-ում»:

Մեծահասակների ԱԱ-ում նորամուտը կնշի 72 կգ քաշային Մալխաս Ամոյանը.

«Մենք հավատում ենք նրա ուժերին, դրա համար էլ նա կազմում է»,- ասել է Էդուարդ Սահակյանը:

Մարզիչը ճեպազրույցը եզրափակել է հետևյալ խոսքերով, որ երկար տարիներ է սպորտում և հավատում է, որ մարզչական կազմով կկարողանան այս փուլը ավարտին հասցնել.

«Մեր առջև խնդիր դրված չէ, բայց պետք է փորձենք գերազանց մասնակցել աշխարհի առաջնությանը»:

Հիշեցնենք, որ ըմբշմարատի աշխարհի առաջնությունը վարկանիշային է Տոկիո-2020-ի համար: Սեպտեմբերի 14-22-ը Ղազախստանի մայրաքաղաք Նուր-Սուլթանում կայանալիք ԱԱ-ում հանդես կգան Նորայր Հախոյանը (55 կգ), Գևորգ Ղարիբյանը (60 կգ), Սլավիկ Գալստյանը (63 կգ), Կարեն Ասլանյանը (67 կգ), Մալխաս Ամոյանը (72 կգ), Կարապետ Չալյանը (77 կգ), Մաքսիմ Մանուկյանը (82 կգ), Արթուր Շահինյանը (87 կգ) եւ Արթուր Ալեքսանյանը (97 կգ)։

 

ArmFootball.com


Soccerway.com

Հարցում
Քվեարկել են (0)  |  Այլ հարցում
Ամենաընթերցվածը

ամիս

շաբաթ

օր

Բոլոր իրավունքները պաշտպանված են: © ArmFootball.com 2019
Մեջբերումներ անելիս հղումը «ArmFootball.com»-ին պարտադիր է:
Գովազդատուներին 055 516 000